Mədə və onikibarmaq bağırsağın xora xəstəliyi
Mədə və onikibarmaq bağırsağın xora xəstəliyi
Mədə və onikibarmaq bağırsağın xora xəstəliyi kifayət qədər geniş yayılmış xəstəliklərdəndir. Xora xəstəliyi - mədə və ya onikibarmaq bağırsağın xoralı zədələnməsi nəticəsində əmələ gələn xəstəlikdir. Xəstəlik adətən vaxtaşırı təkrarlayan epiqastral ağrılarla başlayır, bəzi hallarda isə ağrısız ola bilər. Xora xəstəliyinin etiologiyasında helicobacter pylori, sinir sistemi və hormonal tənzimedici mexanizmlərdəki pozğunluqlar, həmçinin mədənin özündə baş verən dəyişikliklər (turşuluğun artması, selik ifrazının azalması) kimi səbəblər durur.
Xoranın yerindən və ağırlaşmalardan asılı olaraq ağrı ac qarına, gecələr, yeməkdən sonra və ya daimi ola bilər. Ağrı ilə yanaşı qıcqırma, bulantı və qusma da ola bilər. Xəstəlik həftələr və aylarla davam edə bilər, vaxtında müalicə olunmadıqda qanaxma, perforasiya, stenoz törədə bilər. Diaqnoz endoskopik müayinə ilə dəqiqləşdirilir, xora defektinin görünməsi xarakterikdir. Xora xəstəliyi irsi xüsusiyyətlərdən, qidalanma rejiminin pozulmasından, kəskin qidalar yedikdə, spirtli içkilər içdikdə, siqaret çəkdikdə və sinir-psixi gərginlikdən baş verə bilər.
Aşağıdakı əlamətlər xoranın ağırlaşmasından xəbər verir:
- ● Qəflətən başlayan, sakitləşməyən kəskin ağrı;
- ● Qara rəngli nəcis ifrazı;
- ● Qanlı və ya tünd qəhvəyi qusuntular;
- ● Halsızlıq, başgicəllənmə, rəngin avazıması;
- ● Ürəkbulanma, qusma,
- ● Hərarətin qalxması.
Bu əlamətlər müşahidə edildikdə, dərhal həkimə müraciət etmək lazımdır. Dərmanla müalicə xoranın sağalmasına kömək etmədikdə, yaxud ağırlaşmalar baş verdikdə cərrahi və ya endoskopik müdaxilə lazım gəlir.
